MAILIFDA, SP.d

Ibu dari 4 orang putera dan isteri dari seorang suami petugas medic, berasal dari Payakumbuh Sumatera Barat. Saya dilahirkan dari seorang ibu yg berasal dari S...

Selengkapnya
Navigasi Web
Pulang Kampuang
Ilustrasi

Pulang Kampuang

#TANTANGANGURUSIANA

#TANTANGAN GURUSIANA HARI KE 82

Ado raso rusuah, ado pulo sadiah bacampau gaduah bagai. Baa lah kajadi nyo nagari kito kini. Wabah Corona alah tibo dibalahan bumi mano sajo diseluruh dunia.

Dulu wabah virus Corona awak caliak hanyo dinagari Cino. Dek ulah makan makanan nan indak dibuliahkan dek agamo kito.

Makonyo Tuhan berang sahinggo diagiah Nyo dek nan Kuaso azab dinagari Cino tu dengan mandatang kan wabah nan banamo Wabah Virus Corona, bahaso kerennyo COVID 19 nan aratinyo, Corona Virus Desiase 19.

Angko 19 barati tahun datangnyo Virus Corona ko dinagari Wuhan di Cino. Sabana takuik awak mancaliak urang nan banyak mati tagaletak dijalan. Sadang bajalan tau² alah tajatuah dan langsuang mati. Nampak diberita tipi bagalimpangan maik dinagari Cino tu.

Tapi kini Virus Corona alah tibo pulo di nagari awak ko. Baa ndak ka ngeri awak mandanga berita ko. Awak sangko panyakik virus Corona hanyo ado di cino. Tapi ruponyo kini alah tibo pulo dinagari kito.

Dimano sajo seluruh Indonesia alah berlaku Lock Down. Banyak nan indak tau apo aratinyo Lock Down ko. Nan kecek urang Lock Down ko indak buliah awak kalua dari nagari awak tu, tatap tingga dirumah.

Indak buliah kama² do, baitu pulo urang lain indak pulo buliah masuak kanagari awak do. Caro iko kabanyo bisa mamutuih mato rantai penyebaran Virus Corona.

Anak sakola alah tempo. Ujian Nasional untuak anak² nan ka tamat sikolah digagalkan. Bahkan kini sado urang nan manggaleh dipasa nan mengundang keramaian disuruah batutuik. Kalau indak namuah batutuik. Bisa² satpol PP dan polisi bertindak untuak manyegelnyo.

Hondeh mak iyo lah kacau. Jo pitih masuak bagai kini alah tabedo gara² wabah Covid 19 nan luar biaso mambaok sansaro.

Alah banyak urang nan mamakiak kini.

Urang manggaleh apo sajo kini alah abih tabedo. Indak ado jua bali, karano urang takuik kalua rumah.

Kini satiok masuk kakantua² pelayanan masyarakat babasuah tangan tibo dipintu jo sabun caia nan namonyo Sanitaizer baru babilas tangan pakai aia kran nan disadiokan. Kalau alah babasuah tangan tu baru bisa masuak kantua.

Kini di pom bensin pun alah dianjurkan pulo manyadiokan Sanitaizer jo aia kran untuk mambasuah tangan.

Satiok basarobok jo urang, alah batutuik muncuang jo hiduang bagai. Pakai masker katonyo.

Sisuak bilo alah ado kabuik dek pembakaran hutan dianjurkan mamakai masker takuik beko tibo panyakik Ispa. Tapi dicaliak banyak urang nan indak pakai masker dibandiang nan pakai masker.

Tapi kini dek Corona ko sabana takuik kalau kalua indak pakai masker. Ampia sado urang nan tampak dipasa rato² pakai masker. Batambah pulo jo saruang tangan khusus nan tabuek dari karet.

Iyo alah risau mancaliaknyo. Banyak nan takuik urang jo nan banamo mati. Apolai mati kanai Virus Corona ko, indak basumbayangkan bagai, indak bamandikan bagai jo indak buliah dicaliak dek keluarga maiknyo.

Beko kalau mati diantakan dek petugas medis kakubua. Sanak jo sudaro tarimo kaba sajo lai bahwa maik alah bakubua kan.

Ondeh mak bara lah kasadiah nyo kalau tibo jo sanak sudaro kito mati dek kanai Virus Corona ko. Kini kito usahokan lah manjago diri jo kesehatan badan kok lai sayang ka diri surang². Ikuik sajo lah himbauan Pemerintah

Ijan kareh angok surang² sajo nan dipaturuikkan. Kareh angok awak tu bencana tuak urang lain.

Lock Down kecek Pemerintah, Lock Down lah awak. Jan mada juo lai, ibo lah jo diri surang dan jo diri urang lain bagai. Iko ado pulo nan sok² siak bagai.

Padohal kalau ndak ado Virus Corona ko, indak juo nak bajamaah sumbayang kamasajik do. Jan kan sumbayang ka musajik dirumah sajo antah lai Sumbayang antah indak, pandai pulo maupek² pemerintah bagai.

"Alah bakunci Musajik, indak buliah Sumbayang Jumaat bagai lai, iyo lah takuik jo Corona pado jo Tuhan, nan kamati tu alah ado daftar namo nyo jo Malaikaik Israil mah"

"Oi ... kapunduang, jan pandai mangecek sajo, indak mangarati namonyo tu jo baa bana penyebaran Covid 19 ko, ancak diam dari pado mangecek lai, mambuek sakik hati sajo kalau waang mangecek, Phisical Distancing lai waang tau ndak. Makonyo caliak berita danga koran. Jan main Hape youtube sajo nan waang caliak.

Ondeh mandeh, paniang denai.

Kini nan denai surang iyo indak pulo talok Lock Down lai do. Taragak pulo denai jo mandeh kanduang nan acok manangih kini mamikia hiduik kamati.

Mumpuang sabanta lai ari kapuaso bagai. Ancak lah dicaliak Bundo kandung dulu kakampuang.

Kabanyo ado pemeriksaan pulo di perbatasan manjalang pulang kampuang. Bialah dihadang pulo malah beko. Nan jaleh awak lai sehat² sajo.

Insya Allah indak kamambaok panyakik tuak uraang kampuang do. Apolai niat awak lai elok untuak mancaliak urang gaek nan lah lamo pulo taragak basuo.

Tapi syukur Alhamdulillah, antah dek lah malam tibo dibateh antah dek hari hujan pulo, tibo diperbatasan lai indak ado petugas pemeriksaan nan maambek perjalanan do.

Kini bersyukur lai dapek basuo jo mandeh kandunang nan sangaik sanang bana hati bisa basuo jo anak minantu dari Pakanbaru.

Nampak galak mandeh baurai lai bisa juo batamu manjalang masuak puaso ko. Semoga harapan dan doa kito basamo, iyo lah alah tu wabah Virus Corona ko menghantui diri kito.

Hilangkan lah Virus Corona ko itu pinta kito basamo kapado Tuhan Yang Maha Kuaso. Supayo bulan Ramadhan nan kakito jalang basamo dapek kito karajokan rukun sunat dan wajib nyo.

Sumbayang tarawiah bajamaah dapek juo handaknyo kito karajokan dirumah sajik.

Baralah kasanang hati jo kiro² mandanga anak² mudo jo urang² tuo bagai batadarus dimusajik disaat bulan Ramadhan tibo. Bulan nan paliang rancak dari 1000 bulan. Bulan yang panuah jo ampunan.

Semoga Tuhan Nan Maha Kuaso mambari umua panjang jo kesehatan dan kesempatan pado kito untuak batamu bulan Ramadhan nan katibo dalam situasi kondusif sarato Virus Corona alah indak ado. Mudah²an Allah SWT meng ijabah doa² kito.

Amin

Kampuang Nan Denai Cinto

05 April 2020

MAILIFDA

DISCLAIMER
Konten pada website ini merupakan konten yang di tulis oleh user. Tanggung jawab isi adalah sepenuhnya oleh user/penulis. Pihak pengelola web tidak memiliki tanggung jawab apapun atas hal hal yang dapat ditimbulkan dari penerbitan artikel di website ini, namun setiap orang bisa mengirimkan surat aduan yang akan ditindak lanjuti oleh pengelola sebaik mungkin. Pengelola website berhak untuk membatalkan penayangan artikel, penghapusan artikel hingga penonaktifan akun penulis bila terdapat konten yang tidak seharusnya ditayangkan di web ini.

Laporkan Penyalahgunaan

Komentar

Mudah-mudahan Ramadhan tiba, Corona sirna. Yo buk. Alhamdulillah lai bisa pulang kampuang.

06 Apr
Balas

Amin, iyo handaknyo baitu yo ibu. Mudahan kito bisa khusuk melaksanakan ibadah puaso

06 Apr



search

New Post